Hirsmontag: Spitex-Fusion und das grosse Juli-Gewitter

Pouke Miggi mit Verstärkung – gemeinsam mit Ziggi (links) rekapitulierte sie politische Themen. PATRICK LÜTHI
Ein echter Schnitzelbänkler ist auch mit Beinbruch unterwegs. RWI
Dä Hirschpfäffer nahm das Blumenheim aufs Korn. REGINA LÜTHI
Die Hinterwäldler «trauerten» um Hugh Heffner. PLU
Zum ersten Mal dabei: Die Wiiberhööge kamen gut an. RWI

Chlämmerlisäck Fasnacht 2018
Google-Chäre und Postouto di-gi-talisiert
Beamet und per Drohne wärde Päckli hött spediert
D’ NASA flüügt zum Mars, d’ Chinese händ Europa kouft
Nor Zofige bringts ned fertig dass der Lift bem Bahnhof louft

Liebe Mobiliar, als das Wasser schon hoch stand
War es zu spät dass keiner mehr unsere Autos fand
Gerettet sind nur die alten, es macht uns ganz betroffen
Leider sind uns alle neuen Repol-Chläpf versoffen

Piazza suecht en Name füre Märtplatz sisch en Qual
Zofingia-Platz söll dä heisse isch ächt das die richtig Wahl
Ou de Chorplatz wär für Zofingia, bes zum Centralfescht z’prüefe
D‘ Studänte chönnte denn am Uhu zieh und de Chräie rüefe

Die Poller a der Frikartstross düend notzlos ome stoh
Die passe doch zum Stadtrot, dä machts ou eso
Beidi närve choschte Gäld ei Unterschied isch bleebe
Be de Poller sinds nor föif, bem Stadtrot det sinds seebe

E füechte Furz statt Kassesturz, kei Glooria kei Glanz
Us Sport wird Sport vo geschter und d’ Arena striichtme ganz
Be No Billag isch denn ou der Samschtig-Jass passee
S‘ git nor no Fischer Bettware Wädenswil Au am Zürisee

Met Helikopter und Limusine chöme d’Amis of Davos
De Schnee seg great, Bärge nice und d’ Hotelbar famos
20 Minute plagiert de Trump ond goht denn Knall of Fall
Bye bye i käm bäck tu Arosa tu the Humor-Festival

En Schnitzelbank vom Gmeindrot Brittnau lot sech ned vermiide
Drum wend mir hött en Värs übers Storche-Dörfli schriibe
Mehr sueche, gröble und studiere, doch es get kei Knaller
Es riimt sech nüüt of Füürwehr, Autochrazer und Frau Haller

Be de Schwoobe dert geht’s ned nor Maa und Frou
Schwuli, Lesbe Transvestite das gets alles ou
Mit em dritte Gschlächt tuetme Gsöuschaftsform abronde
D’ Schwoobe hend jetzt doch no Gattig vo de Merkel gfunde

Bünzli Fasnacht 2018
Jetzt stigts de Basler no me e`Grind
Wel se Wältkultur Erbe send
Das cha doch ned d‘Wohrheit si
Das d‘Basler Fasnacht esch der bi
Wäre se of Zofige cho
Häte se ons BÜNZLI gno

Sexismus Alkohol im Bundeshuus
Das fende mer Bünzli das esch en Grus
Jetzt esch sogar no eine vor CVP
Das tuet de Christine secher mega weh

D‘Flügerstaffle i de Schwyz esch chli
Wenns so witer got, eschs scho bald verbi
De Parmelin wet am liebschte alles neu
Blibe mer de Schwyzerarme treu

Spitex het jetzt fusioniert
Doch einigi händ, interweniert
Aarburg und Strengelbach
Die troue ned de Sach
Drom wänd se nomol a d‘Urne
Aarbiger fendes doof
Spitex vom Lindehof
Ond Strengelbach vor Hardmatt

D’Altstadt hets doch öberfluettet
Das het doch niemer so vermuetet
Die grossi Wassermasse
Dör eusi schöne Altstadtgasse
Fühere abe bes es Parkhuus
Hät d’Schmier eri Grende gkehrt
Hätte d’Auto ned Schwemme glehrt
Wäre se zom Isatz cho

Am Mittag got e starke Wind
Das esch em Lothar sis chline Chend
Do esch nüt met omeschwanze
Böum gheie diräkt a Rantze
D`Wohnwäge hets, ou grad kehrt
Ziegle gheie elei vom Dach
Ond dröcke aues Flach
S`Bauhaus het leider noni of

D`Chreie flüge of em Chorplatz ome
Was söll me mache, gäg die schwarze Gnome
Me stöut öpis ufe Boum
För d’Chreie gar kei Troum
Denn esch es nor en Plastig UHU
Jetzt muesch am schnüerli risse
Denn eschs verbi met schisse
Kei Vogel intressiert dä dräck

Wisse Schnee met feinem Schoggiguss
Dem seit be de Dütsche Schoggikuss
Bem Schwizer het doch das en andere Name
Das Schribt de Robert Dubler of si Fahne

Das esch doch eifach s‘feine Mohrchöpfli
De Name het sech be eus scho lang bewährt
Das weiss doch wörklech jedes domme Tötschli
De Name gäbe mer ned so liecht här

Mohre, Mohre… Mohrechöpfli
Das händ mer Schwitzer eifach so fescht gärn
Öb Basler, Zürcher, Bärner ond Luzerner
Mer händ dass, all zom frässe gärn
Constantain das esch schlemm, hout em Fringer a Grend
Bloste em de Marsch, und hout em eis i Arsch
Was het är stodiert, ä resch so borniert
Ond sergäbnis devo, sis Bänkli händs em gno
Constantain esch gsi , si ruef esch verbi
Das het är devo, är häts gschiter glo
Bem FCG, wends ne gseh, det esch de Hüppi he
cha de Mäthu meh, mer wärtes gse
Hopp St. Galle, füre met em Balle
Ob Suter eus eschs Worscht, mer händ jetzt dorscht

Gänterli Fasnacht 2018
Met so Stöpsu i de Ohre esch das Läbe Freude pur!
De loufsch dor d Stadt ond besch im Zog muesch niemer grüesse, Yudihu!
De besch för dech, ganz absorbiert ond d Musig het dech vou erfasst.
De Zog dä fahrt ond du hesch Zofige scho s dretti mou verpasst.

In Zofige det dänkt mer vorwärts ond es werd for d’Zuekonft plant.
Zom Bischpöu het do d’Polizei das grosse Wasser lengschtens gahnt!
Si hend drom Onterwasserouto kouft ond das us guetem Grond.
Nor hend’s vergässe, wie im Notfau s’Personau zom Outo chonnt.

De Kim Jong-un esch met em Donald Trump schiints ordli fescht verkracht.
So Sache hemmer früecher no aus Chend bim Sändele scho gmacht.
’s send ned Ragete oder d Frog: Wär het die besser Diktatur
Bim ganze Meis got ‘s nor do drom: Wär het die geileri Frisur!

Di Giuglia Steigrueber ond Stucki Chregu send hüüfig vorab.
De Rotscher Federer ond Nino Schurter mache säute schlapp.
Bim FCL louft‘s ned so rond. Die Speler breiche säute s Gou.
Si wärde gschlage, send am Bode. Tja, de Frenger könnt das ou.

Ar Fasnacht hocksch äng, ’s esch es Poff, es Gschtonk ond d Lüüt hend Fröid do dra.
Öb Party, Schnetzubänk, bim Omzog, uf de Gass, mer liebe da.
Am Äschermettwoch esch s verbii, was mer scho lengschtens iigseh hend.
Set nöischtem gspörsch das Fiiling s ganz Johr i de Mall of Switzerland.

Es wärde d Froue sexuell beleschtigt, s got ned ab de Hand.
So i de Filmwäut ond sogar im Bondeshuus. Es esch e Schand!
Fascht jedi Frou esch det betroffe, so verzöuets i de Lüüt.
Met blööde Spröch ond dööble, nor Martullo-Blocher weiss vo nüd.

Es esch in Zofige vöu los. Es esch jo ned es chliises Näscht.
So hend ehr s nöchscht Johr uf em Thutplatz schiints es riise Swingerfäscht.
Wenn ech dä Platz aluege, frog ech mech: Het das ou Platz det droff?
Das get es Stosse ond es Zie ond öberhaupt es huere Poff.

Ech be do d Zofige. Ha so ne Drock, dass ech chum loufe cha.
De Drock nemmt zue, scho öberlouft ‘s. Ech nuess jetz schnöu e Lösig ha!
D Hand scho zor WC-Tör usgschtreckt, do chonnt e Polizescht, oh gruus.
Chorz vorem Zieu dänk ech entsetzt: Pack nor d Peschtole jetz ned us!

Met Blauliecht rast es Outo noch Sant Orbe, het bir Klinik haut.
Zwe Polizeschte stiige us, de einti jong, de andri aut.
Si renne grad i d Iigangshaue, wo s Kollege bsueche wei.
Si send die letschte vom lozärner Coor, wo no keis Börnaut hei.

Ech gone met de Chend is Giräffli ond säg zom Frölein det,
Ech ging i d Braui ue go jasse, lo d Chend do, wie si s ächt gseht?
Es seg ok. Ech go go jasse ond won ech zrog chom a Ort,
Merk ech: Das Giräffli esch jo e Bar ond ned e Chenderhort.

Met Startups finanziersch Projekt wo d s Gäud deför ned säuber hesch.
Do gänd der frömdi Lüüt chli Gäud, wöu dis Projekt so super esch.
Velecht hend di Kollege Metleid ond si häufe der eso.
So chönnt vellecht ou no de Parmelin zo sine Kampftschet cho.

Mer hend die Autersvorsorg abglehnt wöu di meischte wönd s eso.
Jetz gämmer Vougas, gniesse s Läbe ond dönd d Stötz au dorelo.
Ond hesch met 80gi nüd för s Ässe ond för d Wohnig, frog ned gross.
Denn öberfausch e Bank ond besch för emmer aui Sorge los.

D'Hinterwäldler Fasnacht 2018
De Kim-Jong-Un dä macht es Fescht,
zom glongnige Rakete-Tescht.
D’Chinese händ ou met gmacht,
so händ sis denn zäme gschafft,
Jetzt esch die schöni Rakete,
fasch so luut wie üsi Trompete.

D’Schwiizer-Fuessball Nationalmannschaft,
die het d’WM-Quali weder gschafft.
Mer freue üs of veli Tor,
velech ofs witercho stöu der vor.
Mer freue üs of tolli Stemmig ond ofs Biere,
ond bsonders dass d’Italiäner üs düend serviere.

In Brüssel werd empfange met Laudatio,
de neu Bundesrot de Cassis Ignazio.
Nachem zersch fröndleche Händeschöttle
düend si ganz müesam ade Verträg omeröttle.
De Cassis meint tünd ned we chlini Chend,
sösch holi de Constantin de haut euch eis a Grend.

De Hugh Hefner dä esch ou gschtorbe,
das het mer grad de Tag verdorbe.
Wenn me sech nöm met em Playboy cha amüsiere,
mues me halt s’Zofiger Tagblatt aboniere.
Doch de neu Playboy-Chef dä esch en Bröller,
es esch en Altbekannte de Gerry Möller.

Wenn met de AirBerlin chasch go Ferie mache,
ond StartUps is Jelmoli ziend met allne Sache.
Wenn im Altersheim jede en Virus wet,
ond de Märthalle-Platz ändlech en Name het.
Werd in Bärn im Parlamänt,
de Froue nöm a s’Födli glängt.

Ha im Reisebüro wöue gönstigi Tauchferie bueche,
do het das Fröilein avo flueche.
Ich söll doch die Destination sälber sueche,
ond am beschte ou grad sälber bueche.
Jetzt chom i met em Reisebüro nömme i berüerig,
ond mache Tauchferie ide Zofiger Onterfüerig.

Die einte fendes super die andere en Hohn,
Die regionali Spitex Fusion.
Brettnauer ond Zofiger die se wöuig,
so got en grosse Troum in erföuig.
D’Brettnauer müend ohni z’Motze,
de Zofiger go Födli potze.

D’Raiffise s’Zofige die ziet id Braui,
denn hocke det enne nor no Schlaui.
D’Bänker send denn offe för ne Bieridee,
ond tünd denn Kreditlimite öbersee.
Me gseht denn scho bem Igang vore,
be dere Bank esch Hopf und Malz verlore.

Zofiger Iwohnerrotswahl es esch ke Wetz,
d’CVP di macht drü Setz.
De CVP-Präsidänt werd onderrechtet,
de het ou grad de neu Gwählte brechtet.
För de Nationalrot wäre der ou no kuli,
doch of Bärn scheck i nor no Schwuli.

Pauke Miggi + Ziggi Fasnacht 2018
Jg wett ou gärn e sone Chaare
wo gschiit isch und tuet sälber fahre
wo der Wäg grad sälber suecht
und im Stou ou sälber fluecht

Händ se der Papa Moll Film gseh
dä gsänd immer meh und meh
benere neue Folg gehts en Knüller
als Frau Moll chonnt Theres Müller

De Simi Amme was hesch was gesch
voll Gutzi richtig Schanzetisch
und flügt und flügt dä gueti Maa
derbi het dä doch d’ Vogu Grippe gha

Wennt öppis verschicksch begoscht
gits A B oder gar kei Poscht
hött muesch es Ticket bueche
und am Schalter s’ Päckli sueche

De Repol sind sebe Auto glatt versoffe
jetzt hets emol die rächte troffe
nor s’ ganze das isch s’ tüüre
mehr zahle alles met de Stüüre

De Zirkus Knie tuet vom Heitere goh
ane neue Ort, meh chas ned verstoh
als Ort wär s’ Stadthuus ou ganz schön
dert hets jo scho Kamel und Glöön

Im Bundeshuus do chonsch nöme druus
30 Prozänt düend töple, s’ isch en Gruus
und ei Drittu vo de andere alle
sind am Alkohol verfalle

Neuerdings eus tuets verbääse
muesch dä Seich nor no i eim Teil lääse
s’ Tagblatt geht ab die Zofiger Zytig
bald gits die nor no am Frytig

Zofingia söll de Märtplatz heisse
Piazza findet dass en Scheisse
die Studie hend mehr gseh
die chonnt vo der SVP

Spitex wird jetzt Regionau
mehr fende das ned bsunders schlau
do hesch denn plötzlech nüt me z’lache
wenn e Brittnauer, der chonnt cho en llouf mache

Wiiberhööge Fasnacht 2018 
D Wiiberhööge, d Wiiberhööge, d Wiiberhööge semmer,
Drü rechtigi schroffi taffi frächi höbschi Frouezemmer.
Es esch bekannt, mer Froue wösse immer öppis z’brechte,
vellecht besch du oder du …. En Teil vo üsne Gschechte.

Döblet wird im Bundeshuus, de Buttet hets öbertriebe,
drom het mer z Bärn, es Flirtmerkblatt, för alli Regänte gschrebe.
Gäg die stiife Pfiifli esch dä Text doch voll vergäbe,
mer müesst doch eifach nor es Foti, vo de Martullo druf chläbe.

Vor Johre esch en chliine decke Koreaner bi eus gstrandet,
de Kim Jong-Un esch als Studänt im schöne Bärnbiet glandet.
S’Härz hett är a eus verlore, us langer Ziit wird Frust,
drom fiiret är met Ragetli zönde ständig de 1. August.

Mer drüü Reider Wiiber müend euch klaare Wii ischänke,
mer verstönd doch eifach ned wie ehr do tüend dänke.
Es Gfächt ofem Heitere, Studänteorgie, tüend das mou studiere,
der Zofiger händ doch scho lang en Vogu, jetzt tüend er ne allne präsentiere.

Höche Bsuech am WEF z Davos, dä Löu esch cho plagiere,
no meh ztue förd Sicherheit, d’Armee muess fescht studiere.
Fende der dä Schotz för dä ned chli öbertrebe,
mer hättid doch de Constantin… ei Schlag ond alli send vertrebe.

…ond mer händ Müeh mitem Trump…, …Trump besch sone Lump.

Usverchouf in Leutschebach, das tuet eus gar ned gfalle,
die schönste Färnsehmanne gönd jetzt alli of St. Galle.
Billag wäg, ojemine, was möche mer ohni de Hüppi,
gli scho gsämer, im Färnseh, nor no Wärbig ond blotti Büppi.

De Presidente, vo Frankeriich, de adretti Emanuelle,
het ondbedingt die alti Schachtle Brigitte hürote welle.
Üs drüü Wiiber macht das Muet, of de Rechtig zwarte,
euse Troumprinz goht jetzt äuä erst i Kindergarte.

Wodka, Smirnoff, Slivovic, ond verbotni Sache,
tüend us de Russe super gueti schnälli Athlete mache.
Es Fuessball-Fäscht, i däm Land, das chasch fascht ned begriffe,
ond de tüend die schönste Spieler no of d‘WM pfiffe.

…S’get keni Italiäner det, sie spele ned ar WM met.
S’get keni Italiäner det, sie flüge ned of Rossland mit.
D’WM wird nor halb so schöön, ond öberhoupt esch nüt meh so… wies mou esch gsi.

Mer händ jetzt gnueg ond ou chli Dorscht, mer wösse nüt me zbrechte,
drom send ned zbrav, ond gänd schön Gas, mer bruuche neui Gschechte.
D Wiiberhööge, d Wiiberhööge, d Wiiberhööge simmer,
Drü rechtigi schroffi taffi frächi höbschi Frouezimmer.

Dä‘ Hirschpfäffer Fasnacht 2018
S’Bluemeheim en Zofige esch vom Unwetter stark betroffe,
Date vo de Heimbewohner, em Chäuer ond versoffe,
em Brunnehof herrscht s’Noro Virus, do cha mer nome hoffe,
dass dete uf de Date, de Vireschotz esch gloffe.

Au d’Schöftle hend si d‘Date weder, s’Auterheim cha prahle,
statt fascht 8000 Dollar, hend‘s ein Bitcoin müesse zahle,
bem momentane Bitcoin-Kurs, do ha ni zo mer dänkt,
lohnt sech die Erpressig ned, das esch doch haube gschänkt.

En Bondesbärn herrscht Hochbetreb, d’Froue alarmiert,
dä Buttet vo de CVP, glüschtlet ungeniert,
dank dem Flirt Kodex weiss jetz jede, wie mes dörfi triebe,
de Geri Müller het Glück g’ha, muess er dä Kodex nöm unterschriebe.

Diä No-Billag Beförworter säge, d‘SRG-Gebühre söue of Null absinke,
das Programm seg nor öppis för di Lengge ond Steibock-Tschingge,
doch mou ehrlech, bem ne JA hättisch vöu me Zyt, ond wie,
anstatt Tageschau ond 10vor10, chönsch of em Chorplatz a de Ühle zieh.

Mer gratuliere herzlech, för di nöi Promi-Chenderschar,
dä Serena Williams und de Christa Rigozzi för eres Zwilligspaar,
nor de jungi „Monsieur le président“ Macron, das esch en Lappi,
Vater werd dä ned, aber zom 7. Mou Grosspapi.

Wo n‘är ongfrogt ere s’goldne Chleidli - vom Liib het g’risse gha,
send sini Föödle-Finger – a erere schwarze Huut scho dra,
i ha gseit, er söll das wäg Metoo ond politischer Korrektheit doch la si,
do bisst er i mi Mohrechopf vom Dubler gnüsslech dri.

Set föiftuusig Johr warte d’Jude of de Messias ond tüend liide,
set circa 50ig Johr wartet de Prinz Charles, dass er cha de Thron bestiege,
au d’Berliner warte set Johre, dass sie am neue Floghafe chönd es Ticket chaufe,
ond Zofiger warte, bes de Lift am Bahnhof weder mol tuet loufe.

Dr FC Sion steckt em Abstegssumpf, de Constantin em Wahn,
för us de Misére use z’cho, het er au scho en Plan,
besser aus em Trainer und de Speler gäh s‘Vertroue,
seg’s doch, em Fringer eis a d’Schnorre äne z‘haue.

Em nöie Donald Trump Buech, do esch es schwarz of wyss notiert,
är heig ADS ond seg maximal, ei Minute konzentriert,
en Schriibmaschine Aschlag onder 140 Zeiche pro Minute wäri för ehn bitter,
das längt ned mou förs Tagesgschäft, day by day one Twitter!

Ihr Eintrag wird nach einer Überprüfung online gestellt.
Keine Kommentare vorhanden
Heute auf zofingertagblatt.ch
Frage des Tages
Marktplatz
regiostellen.ch
lift-Demontage.ch GmbH
Lift Demonteur gesucht, Mitarbeiter, Langnau b. Reiden
Alberati Architekten AG
Architektin 80%, Mitarbeiter, Zofingen
Aniviva; c/o Lumena AG
Monteur/Mechaniker 60%, Mitarbeiter, Ohmstal
Grütter GmbH
Kauffrau 40-60%, Mitarbeiter, Roggwil
Job für Mamis, Mitarbeiter,
Suche Klienten die Unterstützu, ,
regioimmo.ch
Abo-Service

Normal-Abo (e-Paper/Digital inkl.)

Schnupper-Abo / Probe-Abo

Digital-Abo

Leserangebote
Partner