Was mer uf sonere Kanzle zo däm bsundere Tag seit,
glaubed mer, das hani lang überleit.
Demeti euch ned ergendöpis langwiligs tuen verzelle,
hani probiert die schönschte Momänt vom Chinderfest zämezstelle.
Öbs spannend wird – do wärde sech d Meinige spalte,
aber eis garantieri – i wird mi churz halte.

De Tag foht theoretisch am 7ni am Morge met de Kanoneschüss uf em Heitere ah,
semmer ehrlech, die meiste vo üs send zo däm Ziitpunkt no dehei em Pijama.
Ergendwenn wachsch met vell Vorfreud uuf,
well höt esch s Chinderfescht ond do freue sech alli druuf.
S wird denn gnueg schnell hecktisch, s parat mache vo Chopf bis Fuess,
well alli plötzlich merke das es schnell goh muess.
Met vell Hoorspray und Vertraue,tuesch de Chinderfescht-Look zämebaue.
Frisure mache, Chleider ahlegge und vellecht scho schminke,
ond ergendwenn dezwüsche söttsch au no en Ovi trinke.
Chum schlüssisch am Chleid oder Hömmli de letscht Knopf,
hesch scho die erschti Kamera vor em Chopf.
Als wärsch de neust Superstar esch d Familie scho am warte,
wie Paparazzis stönd sie förs Fotoshooting parat em Garte.
Es esch alles en perfekte Ablauf, me chönnt fasch d Ziit mässe;
Usser de potenzielli Räge, de het me leider vergässe.
Be schlächtem Wätter esch nämli die ganzi Planig dehii,
well, üsi Standard Rägejacke passt sälte in planti Look drii.

D Ziit bes am 9ni vergoht ratz fatz,
ond scho stohsch meh oder weniger pünktlech uf em Pauseplatz.
Während d Eltere scho ewiigs i de Altstadt uf d Chind luure,
startet för euch de Umzug met Stadtmusik und Tamboure.
Öppis esch nach 200 Johr Chinderfest au no sunneklar,
Bsetzistei ond Absatzschueh, wärded nie es guets Paar.
S esch so schön wie alli fescht tüend plane ond dänke,
wäm sie genau es Röseli wänd schänke.
Früehner esch es Röseli en Ihladig gsi zom am Nomitag ufem Heitere zäme z tanze,
höt eschs Fründschaft, Höflechkeit oder doch en potenzielli Romanze?
Dör d Stadt laufe ond gnau luege wo dass d Familie stoht,sodass me jo ned ohni winke ond Grinse an ihne verbii goht.
S stressigste findi au do das alli Föteli mache,
i mein me cha ned de ganz Umzug schön lache.
S wird am Schluss mindistens 15 schlächti Föteli gäh,
aber solang sie ned i de Zitig lande, cha mes met Humor näh.

Nach em erste Teil vom Umzug tüend gwüssi scho mit de Bloose ringe,
jetzt heissts aber verhebe ond s beste gäh bem Singe.
Bem üebe em Schuelzimmer esch eim gar ned ufgfalle,
wie mächtig die Lieder wärde dür d Chiele halle.
Aber i muess euch no ines Gheimnis ihweihe,
guet zuelose, bes i die hindersti Reihe.
S wird euch äuä gnau so empöre,
es send Fake News das eusi Eltere eus dusse singe ghöre.
Während mer do inne alles tüend gäh,
send die meischte Eltere i de Märthalle am Apéro näh.

I weiss mer dörf de schöni Umzug und die Stimmig ned vergässe,
aber nachher chonnt scho so schnell s nöchste Highlight – s Ässe.
Well mer üsi Zofiger Tradition so liebe, ned devoo wänd wiiche,
gets au zom Ässe set 200 Johr s gliche.
I mein ehr müend euch das mol gnau überlegge,
nonie het es Menü so lang überläbt wie d Zofiger Wurschtwegge.
Zo dere Tradition ghört au, dass jedes Johr die gliche Diskussione laufe,
nämli be wäm goht me s Dessert go chaufe?
Wär esch din Chinderfescht-Torte-Dealer,
Wälchli oder Lüütwyler?
Sett Johre probiert mini Familie usezfinde, wär die besser Torte het,
s esch klar dasi mi met somene riesige Publikum ned z fescht us de Kanzlelehne wett.
Aber i cha die Diskussion kläre, schecke beidne liebi Grüess,
us minere Sicht send beidi Torte eifach nome süess.

Au de Nomitag loht d Härze höcherschloh,
endlech eschs Ziit ufe Heitere z goh.
Für das ziehts vom ältiste Bürger bes zom jüngste Zwärg,
alli zäme ufe Zofiger-Huusbärg.
Während die Traditionsbegeisterte s Spektakel tüend looobe,
chönne sech d Kadette und Freischare ändlech ustobe.
Jetzt eschs Ziit zom Chinderfescht-Bon für Zuckerwatte usgäh,
ond met emne z volle Buch die erschti Chilbi-Bahn-Fahrt z näh.
Während d Freischaare met Ketchup am Bei übere Platz tüend hinke,
probiere d Lehrpersone ganz gsittet ned zvell Wiiswii z trinke.
De Nomitag esch so schnell verbii, zwüsche Freud ond tolle Fründe,
scho bald eschs Ziit zom d Fakle ahzünde.

Au wenns verbii esch, redet me us eim Grund vo däm Tag i so höche Tön,
ond das send ehr, ohni euch wär s Chinderfescht nur halb so schön!
Ehr tüend sett Woche d Lieder singe,
Fahne mole, Märsch üebe ond Ziit uf em Trampolin ond bem Tanze verbringe.
Ehr dörfed wörkli mega stolz uf euch sii,
ond die Form vo Event-Organisation ghört scho fasch in Läbenslauf drii.
Gärn möchti das grosse Dankeschön grad no wiiter nutze,
an alli wo organisiere, Musik mache, schmücke ond d Stadt putze.
Zom Chinderfescht ghöre so vell chlini aber wichtigi Sache,
au alli Lehrpersone wo höt Morge zom 17. Mol Pschhhhhht mache.

Das Ganze drum ond dra machts zom schönschte Tag em Zofiger Johr,
feschtlechi Stimmig, guets Ässe ond Blueme am Hömmli oder i de Hoor.
S Chinderfescht esch en Tag wo sech jede in Kaländer schriibt,
ond wos au die entfärntischte Zofigerinne zrugg id Altstadt triibt.
En Tag wo me sech uf die ganzi Laadig Tradition ihloht,
ond de Zuckerkonsum – spötistens am Nomitag – dür d Deeli goht.

Gnüssed de Rescht,
vo üsem traditionsgladene Zofiger-Fescht.

Tüend üchi Chinderfest-Bon ned z fescht spare,
ond wär weiss – vellecht gwünne ja das Johr weder mol d Freischare.

*Alexandra Hopp (24) ist Psychologiestudentin und schreibt in ihrer Freizeit Gedichte und Texte.